BismillahirRahmanirRaheem
….
Kya Imam Abu Hanifa r.a ki Koi Kitab hai ???
Imam Abu Hanifa r.a Ki Kitabon Ke Naam Kya Hain ???
Ye wo Aam Waswase hain Jo Naam Nihad Ahle Hadees ( Ghair Muqallideen ) ki Taraf se Seedhi Sadhi Sada Zahan Awaam ke Dil Dimagh me Bithaye Jate hain….Is Waswase ke Zariye Goya Ghair Muqallideen Ye Tassur Dena Chahte hain Ki Imam Abu Hanifa r.a ki Koi Kitab hi nahi aur Na hi Unse Koi Kitab Sabit Hai….
Lekin Afsos Ghair Muqallideen ke.Doosre Waswason Ki Tarah ye Bhi Ek Khokhla Waswasa hai , Jiski Koi Buniyad nahi….Aaj Ham Insha Allah Aapki Khidmat me Kuch Aise Halawajat Pesh Karenge Jisse Ye Sabit Ho ki Imam Abu Hanifa r.a ki Na Sirf Kitaben Hain Balki Unki Kitab ko Dekhkar hi Doosre Muhaddiseen Aur Fuqha ne Apni Kitabon ko Tarteeb di Hai….
ALLAH se Dua ki wo Hasidon ke Hasad Aur Muta’asaib Logon ke Ta’asub se Hamari Hifazat kare…Aameen
Isi ke Tahat Kuch Hawale Scan ke Sath Aapke Pesh e Khidmat hai…
1-Hazrat Ibn Hajar Asqalani r.a (Shafai)Farmate hain :-
“Imam Abu Hanifa r.a ki Hadees me Mufarrad Kitab “Kitab ul Aasar” hai Jo Imam Muhammad Bin Hasan r.a ne Unse Riwayat ki Hai”…
2- Hazrat Abu Abdullah Hussain Bin Ali Sumairi r.a Apni Kitab me Hazrat Sufiyan Soori r.a se Basanad Naqal Karte hain :
Zaida r.a ne Kaha Maine Sufiyan Soori r.a ke Sirhane ek Kitab rakhi dekhi Jise wo Aksar Dekha karte the..Maine inse wo Kitab dekhne ki Ijazat Talab Ki, Inhone wo Kitab mujhko di , Wo Kitab Imam Abu Hanifa r.a ki “Al Rahan” thi…Maine unse Kaha ki Kya tum Unki Kitaben dekhte ho…Unhone Kaha Meri Khuwahish hai ki Unki Sab Kitaben mere Paas Jama hon….Ilm ke bayan karne me Unse Koi Bat Rahi nahi hai…Lekin Ham Unke Sath Insaaf Nahi Karte hain…..
( Akhbar Abi Hanifa r.a Wa Ashabihi Safah 74 )
Batayen Hazrat Sufiyan Soori r.a Jaisa Jalil Ul Qadr Faqih Aur Muhaddis To ye Tamanna Kare ki Kash Mere Paas Imam Abu Hanifa r.a Ki Sari Kitaben hoti aur Aajkal ke Ghair Muqallideen ye Tassur Dena Chahte hain Ki Imam Abu Hanifa r.a ki Koi Kitab hi Nahi….Ab Aap Khud Faisla Karen Ki Ye Ghair Muqallideen Sahi Hain Ya Ghalat
3- Hazrat Abu Abdullah Hussain Bin Ali Sumairi r.a Apni Kitab me Hazrat Yazeed Bin Haroon r.a Ki bat Basanad Naqal Karte hain :
Abu Muslim r.a ne (Shaikh Ul Islam) Yazeed Bin Haroon r.a se Poocha “Aey Abu Khalid Tumhari Abu Hanifa r.a aur Unki Kitabon ke Muta’ale ke Bare me Kya Rai hai” ?
( Yazeed Bin Haroon r.a ne ) Kaha “Agar Tum Faqih Banna Chahte ho to Unka Muta’ala Karo , Maine Kisi bhi Faqih ko Unse Beniyaz Nahi Dekha”….
( Akhbar Abi Hanifa r.a Wa Ashabihi Safah 74 )
Dekhiye Hazraat Shaikh UL IsLam Yazeed Bin Haroon r.a Kya Farma Rahe hain…. Unke Kehne ki Murad Mutabiq Koi bhi Faqih Unki Kitabon Se Fayda Uthaye Bagher nahi Rehta…Yani Unki Kitaben Standard Set Karti Hain Fuqha Keliye , Ke Unhe Apni Fuqahat Ko Tarashna hai To Imam Abu Hanifa r.a Ki Kitabon Ka Muta’ala Karna Chahiye , Unse Mustafeed Hona Chahiye…
4- Abdullah Bin Daood Khuraibi r.a Farmate hain : Jo Shakhs Chahe ki Nabenai aur Jahalat ki Zillat se Nikle aur Fiqah ki Lazzat se Ashna Ho , Isko Chahiye ke Imam Abu Hanifa r.a ki Kitaben Dekhe….( Safah 85 )
Imam Shafai’i r.a Farmate hain : Jis aadmi ne Imam Abu Hanifa r.a ki Kitaben nahi dekhi wo Fiqah me mahir nahi hoga….
( Akhbar Abi Hanifa r.a Wa Ashabihi Safah 87 )
In 2 Hazraat Ke Qaul Apni Kahani Khud Bayan kar Rahe hain…..Ki Akabireen e Ummat Ki Nigah me Imam Abu Hanifa r.a Ki Kitabon ki Kya Ahmiyat thi….Tab Hi to Apne Waqt ke Bare Bare Ulama tak Imam Abu Hanifa r.a ki Kitabon ka na sirf khud Muta’ala Karte the , Balki Doosron ko Bhi Iski Talqeen Karte the…..
Ki Agar Tum Faqih Banna Chahte Ho , Jahalat se Nikalna Chahte ho to Imam Abu Hanifa r.a Ki Kitaben Paro….Jis Tarah aajke Waqt me bhi Kaha Jata hai ki Agar Tumhe Falan Field me Mahir Hona hai to Falan Musannif ki Kitabon Ko Lazim Pakar Lo , Kuch Isi Tarah ki Haisiyat Ki Imam Abu Hanifa r.a Ki Kitabon ki Haisiyat thi….
Jis Bat ki Gawahi Khud Imam Shafa’ii r.a Aur Hazrat Yazeed Bin Haroon r.a ne de di , Balki Hazrat Abdullah Bin Daood r.a To Unki Kitabon Ko Itna Mante the , Jahalat se Agar Kisi Ko Nijat Pani hai To Wo Imam Abu Hanifa r.a Ki Kitabon Ko Apna Sarmaya Bana Le….
Yahi Wajah thi Ke Apne Waqt Ke Duniya Ke Bare Bare Ulama bhi Imam Sahab r.a Ki Kitabon ka Muta’ala Karte the…..Jinme Hazrat Sufiyan Soori r.a Ke Bare me To Aap Alhamdulillah Pehle Hi Par Chuke…..Aaj Imam Malik r.a Jo Kisi Penchan Ke Mauhtaj Nahi Unke bare me bhi Jan Len , Wo Khud bhi Imam Abu Hanifa r.a Ki Kitabon se Mustafeed Hote the….
Unke Bare me aata hai ki :
Imam Malik r.a Imam Abu Hanifa r.a ki Kitabon Ka Muta’ala Karte the aur Unse Naf’a Andoz Hote the…
( Al Intiqa Safah 43 )
Batayen Hazrat Upar Jin bhi Ulama Ke Hawale Guzre Unme se Ek bhi Koi Mamooli Insan nahi….Inme se Koi Mujtahid, Koi Faqih Wa Koi Muhaddiseen hai….Lekin Aap Imam Abu Hanifa r.a Ki Kitabon Ka Isse Maqam Samjh Sakte hain , Ki Unki Kitabon ne Kitna Ooncha Ma’ayar Set Kar Rakha tha Ki Bare Bare Akabireen e Ummat bhi Unki Kitabon se Fayda Hasil Kiye Bagher nahi rehte the….
5- Hazrat Kamal Uddeen Ahmad Bin Hasan Bayazi r.a Imam Abu Hanifa r.a ki Kitabon ke Bare me Naqal Karte hain :
“AL Fiqah AL Akbar” “AL Risalah” “AL Fiqah AL Absat” “Kitab Aalim wa Muta’alim” “AL Wasiyah” Unke Ashaab ke Zariye ImLai Tarz par Riwayat Kari Gayi Hain….
( Isharat Ul Maraam Safah 10 )
Is Ibarat se Saaf Pata Chalta hai Ki Ye Sab Kitaben Imam Abu Hanifa r.a ki hi Tasaneef hain , Jo Unke Ashaab ne Unse ImLai Tarz par Naqal Kari hai , Kyonki Us Waqt me Yahi Tariqa Aamtor par Rajeh tha….Ki Shaikh ImLa Bolta Rehta aur Shagird use Naqal Kar Lete the….
Isliye ALLama Muhi Uddeen Abdul Hameed r.a ne is Tariqe ko Kafi Saraha hai aur Ise Taleef aur Tadrees me Sabse behtar Qarar diya hai….Chunanche Farmate hain :
” Hadees Hasil Karne ke Tariqon me Sabse Ooncha , Taraqqi Yafta aur Qawi Tareen Tareeq ye hai ke Rawi Shaikh ke Alfaz se Chahe Shaikh Kisi Dastawez se ImLa Kara raha ho Ya Zabani Yad’daasht se… ImLa karana Tehdees me Ghair ImLa se Behtar hai “….
( Ta’aleeqat ALa AL Tauzeeh 295/2 )
Hafiz Ibn SaLah r.a ne bhi apni Kitab “Muqaddamah Ibn SaLah” me Naqal Hadees aur Tahammul Riwayat me ise Sabse Oonchi Qism Qarar diya hai….
6- Hazrat JaLaL Uddeen Suyuti r.a (Shafai’i) Imam Abu Hanifa r.a ki Khususiyat Naqal Karte hue Likhte hain :
“Sabse Pehle Inhone ILm e Shari’at ki Tadween ki hai..aur Abwab me iski Tarteeb di hai phir Imam Malik r.a ne Motta me inki perwi ki hai…Imam Abu Hanifa r.a se pehle kisi ne ye kam nahi kiya Kyonki Hazraat e Sahaba Karaam r.a aur Taba’ieen r.a ne Uloom e Shari’at me Abwab aur Kitabon ki Tarteeb ka koi Ahtmam nahi kiya… Wo to sirf Apne Hafze par Aitmad karte the , Jab Imam Abu Hanifa r.a ne Uloom ko Muntashir dekha aur iske Barbad hone ka Khauf kiya to (Kitabi ShakaL me) Abwab ki soorat me Mudawwan Kar diya…..
Sabse Pehle Taharat ke Masail Zikr kiye, phir Namaz ke, phir tamam Ibadaat ke, phir Ma’amlaat ke aur apni Kitab ko Ahkam e Meeras par Khatm kiya…Isliye ke Insan ka yahi sabse Akhiri Haal hai….Imam Abu Hanifa r.a hi wo pehle Shakhs hain jinhone Kitab UL Faraiz aur Kitab UL Shuroot ko Waz’a kiya….Isliye to Imam Shafa’ii r.a ne Farmaya hai “Fiqah me Sab Log Imam Abu Hanifa r.a ke Mohtaj hain “…..
( تبييض الصحيفه فى بمناقب ابى حنيفه 119 )
Yahi Bat Ibn Hajar Makki r.a ne “AL Khairat UL Hisan” me aur ALLama Shams Uddeen Muhammad bin Yausuf r.a (Shafa’ii) ne “Uqood UL Jam’aan” me Naqal Kari hai….
Dekha Hazraat In Ibaraat se Saaf Zahir hai ki Imam Abu Hanifa r.a hi Wo Pehle Shakhs hain jinhone Masail aur Hadeeson ko Kitabi ShakaL me Abwab ki Soorat me Mehfooz Kara hai , Phir Imam MaLik r.a ne Apni Kitab “Motta Malik” me Imam Abu Hanifa r.a ki perwi ki hai Yani Unhi ki Tarz par Unhone Apni Kitab ko Murattab kara hai…..aur Motta MaLik ko Dekhkar hi Imam Bukhari r.a Aur Imam Muslim r.a ne Apni Kitab ko Tarteeb di hai….Jaisa ki Shah Abdul Aziz r.a ne Likha hai :
” Sahi Bukhari aur Muslim Agarche Tafseel Ke Lihaz se Motta (MaLik) se 10 guni hai, Lekin Riwayat Ahadees ka Tariqa , Rijal ki Tameez aur Aitbar wa Istanbat ka dhang Motta se hi Seekha hai…..
( عجاله نافعه 5 )
In Tamam Baton se Pata ChaLa ki Imam Abu Hanifa r.a ki Kitabon ko Dekhkar aur unse Seekhkar hi Fuqaha aur Muhaddiseen ne Apni Kitabon ko Tarteeb dena Seekha hai….ki Kis Tarah Kitabon ko Abwab ki ShakaL me Likhna hai…..
7- Mash’hoor Maurrikh Muhammad Ibn Yaqoob Ibn Nadeem r.a Apni Kitab “Al Fehrist” me Imam Abu Hanifa r.a ke Haalat me Likhte hain ki Aap Taba’i the…
Phir aage Likhte hain ki “AL Fiqah AL Akbar” “Kitab AL Risalah” ” Kitab AL Aalim WaL MuttaLim” aur “Kitab Radd ALa Qadria ” Aapki Tasaneef hain…
( Fehrist Ibn Nadeem Safah 256 )
ALLAH se Dua ki wo Hasidon ke Hasad Aur Muta’asaib Logon ke Ta’asub se Hamari Hifazat kare…Aameen
….
No comments:
Post a Comment