Wahdatul Wujood ka SAHEEH Matlab aur Uska Saboot wa Sharii Haisiyat Salaf-o-Saleheen se Part 1

Wahdatul Wujood Yeh Tasawwuf ki Istelaahe hai Jo ke Ahle Tasawwuf aur Sufiyaan e Izaam ke Yaha Ma’aroof wa Mashoor hai.

Magar Maujuda Zamaane me Ek Tabqa jo ke Is Istelaahaat se Nawaqif hai, Yeh Masle ko Kufr-o-Shirk ka aqeeda qaraar derahe hai aur Jo Jo Hazraat Is Aqeeda ke Haamil the, Unko Kaafir Kehne se bhi Gurez nahi kar rahe hai.

Chunke Yeh Masla, degar Masaail ki Tarah nahi Lehaaza Isko Samjhne ke liye Dhiyaan aur Tawajjo ki Zarurat hai kyunke Yeh Shariyat ke Baarik Masaail me se hai.

Wahdatul Wujood ka Naam Agarche Hazrat Muhiuddin Ibn ul Arabi Rh. Al Mutawaffa 638 Hij. se Mashoor hai, Lekin Iska Mafhoom Pehle ulama se bhi Milta hai, Jaisa ke Saheeh, Zaeef, Hasan, Shaaz wa Munkar wagaira ki Istelaahate agarche Huzur SAW ke Daur Is naam ke saat Maujood Nahi thi, Lekin ispar Ittefaaq hai ke In Istelaahaat ka Mafhoom Maujood tha.

Pas, Yahi Muaamla Wahdatul wujood ka hai.

Wahdatul wujood ka Saheeh Matlab Yeh hai :

Puri Dunya me Haqeeqi Wujood Sirf Baari Ta’ala ka hai, Jiski Zaat ko kabhi Zawaal Nahi hai, Uske Alaawa Dunya me Jitni bhi Makhluqaat Maujood hai wo Sabke sab Zaeef, Haqeer aur Faani hai.

Kyunke Har Maklooq Apne Wujood ke liye Baari Tala ki Mohtaaj hai, aur Agarche Maqlooq ka Wujood hai Lekin Baari Ta’ala ke Wujood ke Saamne Unke Wujood ki Koi Haisiyat Nahi hai, wo Kal-adm [Negligible] hai.

Pas, Maloom huwa ke Saari Maqlooq ka Wujood Allah Tala ke Hukum se hai.

Gooya Saari Kainaat Ek Khuda ke Wujood [Hukum] se Wujood me aayi hai, aur Yahi Wahdatul Wujood ka Ma’ana hai.

Isko Misaal se Samjhe ke Din ke Waqt Aasmaan par Suraj Maujood hone ki Wajeh se Taare Dekhaayi Nahi Dete, Halaanke wo Apne Jagah Maujood hai, Lekin Suraj ka Wujood Unpar Ghaalib aata aur Jiski Wajeh Taara ka Wujood Nazar Nahi Aata.

Isi Tarah Jis Shaks ko Allah tala Apne Karam se Uski Ma’arifat Aata ki ho, Toh Usko Dunya ka Har Wujood Haqeer, Zaeef aur Faani Nazar Aata hai, Kyunke wo Mohtaaj hai Baari Taala ke Wujood ka.

Bas, Yahi Wahdatul Wujood ka Saheeh Ma’ana hai aur Yahi Maane Musallam wa Mashoor hai.

Note 1 :

Wahdatul Wujood ke Masle me Hum Makhluqaat ka Inkaar NAHI Karte, Balke Hum Kehte hai ke Khaaliq ka Wujood bhi hai aur Makhlooq ka Wujood bhi hai.

Lekin Khaaliq ke Wujood ke Muqaamle Makhlooq Kal-adb [Negligible] hai, Jaisa ke Tafseel upar Zikr ki gayi hai.

Note 2 :

Hum Wahdatul Wujood ke Masle me Hum Khaaliq aur Makhlooq ke Darmiyaan Farq ke Qaayil hai.aur jo shaks Is Farq ko Mitaaye, aur Yeh kahe ke Khaaliq aur Makhlooq Ek hi hai aur

Toh wo hamari Nazar me wo Shaks Kaafir hai.

Wahdatul Wujood ke bare

1 – Hazrat Thanwi Rh. Apni Mashoor Kitaab Shariyat wa Tareeqat me Farmaate hai :

“Go [Agarche] Mumkinaat[Makhluqaat] Maujood hai Kyunke allah tala ne Unko Wujood diya hai, Maujood Kyun na Hote Magar Wujood Haq ke Ruh baru [Muqaamle me], Nihaayat Naaqis aur Zaeef wa Haqeer hai,

Isliye Wujood e Mumkin [Makhlooq] ko Wujood e Haq ke Ruh baru Go [Agarche] adam [Na-hona] na Kahenge, Magar Kal-adm [Negligible] Zaroor Kahenga.

Jab Yeh Kal Adm huwa, Toh Wujood e Mutadbihi [Asal] Ek hi Rehgaya.

Yahi Ma’ana Wahdatul Wujood ke”.

(Shariyat e Tareeqat : Safa 310)

Scan Page :

Ghaur Farmaaye !  Hazrat Thanwi rh. ne Makhlooq ke Wujood ka Inkaar Nahi kiya, Magar kaha ke Unke Wujood ki Haisiyat Khaaliq ke Wujood ke Saamne Kal-adm [Negligible] hai, Pas Yahi Ma’ana Wahdatul Wujood ke hai.

2 – Maulana Zafer Ahmed Usmaani rh. Farmaate hai ke

Ispar bhi Ittefaaq hai ke Mumkinaat ko Allah tala ne Paida Farmaaya, Jisse Ba-zaahir wo bhi Sifat e Wujood ke saat Mausuf [Mile] Nazar Aate hai aur Isme bhi Koi Shak nahi ke allah Tala ka Wujood Waajib Naabil e zawaal Abadi wa Azali [Hamesha wa Hamesha se] hai.

Mumkinaat ka Wujood Haadis [Paida Karne waala] aur Mujid [Wujood me Laane Waala] ka Mohtaaj hai.

Phir Bahes Karte huwe Farmaate hai ke Mumkinaat ke liye Mustaqil Wujood Nahi, Wujood e Mustaqil bas Ek hi hai, Yaani Wujood e Haq aur Mumkinaat ka Wujood Khiyaali aur Wahmi hai. (Tehqeeq Wahdatul Wujood : Safa 23)

Scan Page :

Hazraat ! Wujood e Haqeeqi ke Saamne Wujood e Mumkinaat Haadis aur wo Mustaqil Wujood Nahi, Pas Wujood e Mustaqil Ek hi hai, Jo ke Wujood e Baari Tala hai.

Yahi toh Wahdatul Wujood ka Ma’ana hai Kyunke Jab Saare Wujood Ghair Mustaqil hai, Toh Sirf Baari Ta’ala ka Wujood  hi Mustaqil aur La-Zawaal hai.

Algarz Yahi, Wahdatul Wujood ka Saheeh Matlab hai.

3 – Maulana Idrees Kandhelwi Rh. Farmaate hai ke

Baaz Sufiya e Kiraam Jo Wahdatul Wujood ke qaayil hai, Unki Yeh Muraad Harghiz nahi ke Banda Khuda ke Saat Muttahid hojaata hai, Isliye ke Yeh Saraasar Kufr aur Ilhaad hai.

Unki Muraad Yeh hai ke Asal Wujood Toh ek hai Yaani Wujood e Khudawandi, Baaqi Hech [Kuch Nahi] Jaise Aftaab Jab Tulu Karta hai, toh Aalam ka Har Har Zara Raushan hojaata hai, Toh Raushan aur Munawar Toh Laakho aur Kadordo hai, Magar Noor Ek hi hai.

Ya Yu Kahiye ke Jin Hazraat par Allah tala ki Muhabbat ka Ghalba hota hai, Unko siwaaye Khud Tala ke (Noor ke) Koi cheez Nazar Nahi aati, Yeh Khaas Kaifiyat aur Khaas Halaat hai Jinpar guzarti hai, Wahi Jaante hai.

(Ilm ul Kalaam : Safa 179)

Scan Page :

Yaha Hazrat Idrees Sahaab Rh. ne bhi yahi Baat Kahi hai ke Asal Wujood Toh Khaaliq ka hi hai, Lekin Makhlooq ke Wujood ka Inkaar Nahi kiya.

4 – Hazrat Maulana Maseehullah Khan Sahaab Rh. Farmaate hai ke

Wujood e Haqeeqi Zaat e Waajib wa Ahad [Yaani Allah tala] ke liye hai.

Dusre Maujudaat Mumkinaat Jo bizaat [Zaat ke Aitebaar se] Ma’adoob [Nahi] the, Zaat e Waajib ke Ejaad se Baadal-Adam [Wujood me Maujood huwe], Toh Jis Tarah Apne Wujood me zaat e waahid ke Mohtaaaj huwe, Isi Tarah Apne Biqaa [Baaqi Rehne ke liye bhi] me bhi Mohtaaj hai.

Aur Har Wujood Hayaat me Zil Ikhteqaar Ilaz-Zaatil Waajib hai. [Yaani Har Wujood Hayaat ke liye Zaat e Waajib [Allah tala] ka Mohtaaj hai.]

Pas, Aisi Zaat e Waajib ke Ruh baru Dusre Maujudaat ka Wujood Nihaayat Haqeer wa Zaeef wa Az’af wa Anqus wa Naaqis wa Muzmahil [Naaqis] hota hai aur Kal-adm [Negligible] hota hai.

Yahi Maane Wahdatul Wujood ke Yaani

Kul [Agarche] Mumkinaat toh Maujood e Zaahiri hai, Lekin Haqeeqat me koi Maujood Nahi Hasti e Kaamil [Yaani wo Hasti Jisko Zawaal Nahi] ke saat, Maujood Nahi Ba-juz [Siwaaye] Zaat e Haq ke.

(Shariyat-o-Tasawwuf : Safa 258)

Scan Page :

5 – Faqi e Asar Maulana Taqi usmaani Damat Barakatuhum Farmaate hai ke

Wahdatul Wujood ka Saheeh Matlab Yeh hai ke Is Kainaat me Haqeeqi aur Mukammal  Wujood Sirf Zaat e Baari Taala ka hai.

Uske siwa Har Wujood Be-Isbaat, Faani aur na-Mukammal hai.

Ek Toh Isliye ke wo Ek na Ek Din Fanaa Hojaayega,

Dusra Isliye ke Har Shai (Cheez) Apne Wujood me Zaat e Baari Taala ki Mohtaaj hai.

Lehaaza Jitni bhi Ashyaa Hume Is Kainaat me Nazar Aati hai, Unhe Agarche Wujood Haasil hai, Lekin Allah ke Wujood ke Saamne us Wujood ki Koi Haqeeqat Nahi, Isliye ke wo Kal –adb [Negligible] hai.

Aage Misaal dekar Farmaate hai ke

Jaise Din ke Waqt Aasmaan par Suraj Maujood hone ki Wajeh se Sitaare Nazar Nahi Aate, wo Agarche Maujood hai, Lekin Suraj ka Wujood unpar is Tarah Ghaalib Hojaata hai, ke Un [Sitaaro] ka Wujood Nazar Nahi Aata.

Isi Tarah Jis Shaks ko Allah ne Haqeeqatan Shinaas Nigaah di ho, wo Jab Is Kainaat me Allah tala ke Wujood ki Maarifat Haasil Karta hai, Toh Tamaam Wujood use Hech, Maand hai, Balke Kal-adb [Negligible] Nazar aate hai.

“Wahdatul Wujood” ka Yeh Matlab Saaf, Waazeh aur Durust hai.

(Fataawa Usmaani : Jild 1 : Safa 66)

Scan Page :

6 – Hazrat e Aqdas Haji Imdadullah Muhajir e Makki Rh. ne Wahdatul Wujood ke Unwaan se Risaala Likha hai, Jisme Wahdatul Wujood ke Yahi Matlab Bayaan kiya hai,

Aur Aap Rh. ka risaala “Wahdatul Wujood” Darul Ishaat Karachi se Chapa hai.

Algarz Hazraat ! Wahdatul Wujood ka Sahaah Ma’ana Yahi hai ke Khaaliq ka Wujood hai aur Makhlooq ka, Lekin Khaaliq ke Saamne Makhlooq Itni Kamzoor Balke Kal-adm hai ke Sirf Khaaliq hi ka Wujood Baaqi rehte hai.

Aiteraaz :

Baaz Quraan wa Hadees par Amal karne waale Naam Nihaad Hazraat Wahdatul wujood ka Ma’ana yeh karte hai ke Khaaliq aur Makhlooq Ek hi hai aur Kehte hai ke Ulama e Deoband Ahle Sunnat wal Jamaat Gumraah hai aur Baaz Hazraat Hadd Aage Bardkar Kehte hai ke Ulama e Deoband Kaafir aur Mushrik hai.

Al – Jawaab :

Humne Pehle Wahdatul Wujood ka Ma’ana waazeh Kardiya hai ke Hum Khaaliq aur Makhlooq Dono ke Wujood ke Qaayil hai aur Dono ke Darmiyaan Farq Maujood hai Jaisa ke Humne Upar Zikr kiya hai.

Ab Jo Mafhoom Wahdatul Wujood ka Hum Lete hai ke Usme Toh Sirf yeh hai ke Saari Makhlooq Allah tala ke Wujood se hai aur Makhlooq ka Wujood aur Uski Haisiyat Allah Tala ke Wujood wa Haisiyat ke Saamne Kuch bhi Nahi hai.

Bas, Is Naziriye se Sirf Khaaliq ka Wujood rehta hai aur yahi Wahdatul Wujood hai aur Wahdatul Wujood ka Lughwi Ma’ana bhi yahi hai ke ‘EK WUJOOD HONE KE’.

Aur Har Aam Musalmaan Yahi Aiteqaad Rakhta hai ke Mera Wujood aur Meri Haisiyat Allah ke Saamne Kuch bhi nahi hai, Jo bhi hai Bas wahi hai.

Mere Dosto ! Yahi toh Wahdatul Wujood hai, Isme Aam Musalmaan ne Yeh Kaha ke Allah aur Banda Dono Ek Hogaye hai.

Mazeed jo Log Ulama e Deoband par Yeh Ilzaam Lagaate hai ke Unke Nazdeek Wahdatul Wujood ka Ma’ana yeh hai ke Allah aur Banda Ek hi hai.

Bilkul Jhoot aur Fareeb hai, Balke Jo Hazraat Yeh Ilzaam Lagaate hai Daraasal wo Wahdatul Wujood ka Ma’ana Apne Taraf se Kardete hai aur Ulama e Deoband ke Khaate me Lagaadete hai.

Jabke Khud Ulama e Deoband Ahle Sunnat wal Jamaat ne Kaha ke Jo Yeh kahe ke Banda aur ALLAH Ek hi hai, Usne Kufr kiya hai.

Chunaanche Khud Hazrat Thanwi Rh. Farmaate hai ke

Usko (Yaani Wahdatul Wujood ko) Istelaahe Sufiya me ‘Aainiyat’ se Ta’abeer Karte hai aur ‘Aainiyat’ ke Ma’ane Yeh Nahi ke Dono ek Hogaye, Yeh Toh Sareeh Kufr hai.

(Shariyat wa Tareeqat : Safa 312)

Scan Page :

Hazrat Maulana Idrees Kandhelwi Rh. bhi Farmaate hai ke

Baaz Sufiya e Kiraam Jo Wahdatul Wujood ke qaayil hai, Unki Yeh Muraad Harghiz nahi ke Banda Khuda ke Saat Muttahid hojaata hai, Isliye ke Yeh Saraasar Kufr aur Ilhaad hai.

(Ilm ul Kalaam : Safa 179)

Scan Page :

Algarz Yeh Aiteraaz hi Baatil wa Mardood hai.

aur Hamaare Ghair Muqallideen Hazraat Aksar

Hazrat Thanwi rh. se Yeh Baat Naql karte hai ke Unhone Wahdatul Wujood Masle ko SAHEEH qaraar diya hai, par waha Wahdatul Wujood ki Tashreeh [Hazrat Thanwi Rh. se Naql Karne ke Bajaaye] Apni Taraf se Kardete hai.

Kya Yeh aap Hazraat ka Dhoka Nahi hai ?

Mazeed Next Article me Ulama e Deoband se Pehle Kon Kon se Muhaddiseen wa Ulama Wahdatul Wujood ke Qaayil hai Unka Zikr kiya Jaayega….Qususan Hazrat Shah Wali ullah Muhaddis Dehelwi Rh. aur Unke Khandaan ka Wahdatul Wujood ke Mutalliq Nazariye ko Zikr kiya Jaayega.

Insha-ALLAH.