TABLEEGHI JAMAT KA NISAB 3 DIN, 40 DIN AUR 4 MAHINE KYUN…
=======================================
Kuch logo ko is bat par aitraz hota hai ki akhir tableeghi jamat ka kaam jo hota hai uska nisab 3 din he kyun, 40 din he kyun, 4 mahine he kyun, to bhai ye jihalat wala sawal hai ALLAH ne Quran mein farmaya ki jiska mafhoom hai “Logo ko apni taraf bulao ahsan tareeke se jo behtar ho” yani Haq ki dawat do behtar tareeke se. Nabi SAWW ne farmaya “fal yuballighish shahidul ghaiybah” Ye jo paigham hai ise jo log shahid hain yani maujood hain wo log ghaybeen tak pahuncha de yani jo nahi hain ya abhi is duniya mein aye he nahi hai”. Ab na to ALLAH SWT ne koi makhsoos tareeka bataya aur na he Nabi SAWW ne he bataya ki dawat kis nisab se do, ab Dawat akhir deni thi aur logo tak paigham ko pahunchana tha, ghair muslimo mein bhi, aur jo apne iman wale bhai hain jo DEEN se door hain un tak bhi, to Ab Dawat ke liye koi na koi to nisab banana he padega, ya kisi na kisi tarz par to kam karna he padega, jis tarah madarse mein class lagte hain kahin 1 ghante ka aur kahin 45 minute ka. Ab koi kahe ki is tarah se Nabi SAWW ne nahi padhaya to phir madarse kyun? Usme padhayi ke period kyun? Phir ye to sarapa JIHALAT, Dimagh ki ghalazat aur Ibleesiyat ho sakti hai ki use har DEENI kam se aitraz ho. kabhi kisi ne ye nahi poocha hoga ki English Medium mein padhana kahan se sabit hai? Ladkiyo ko skirt pahenakar unhe school bhejna kahan se sabit hai? English seekhna kaha se sabit hai?? ladko aur ladkiyo ka ek sath padhna kahan se sabit hai? ye MBA aur MCA kahan se sabit hai? Kis Sahabi ne apne bacho ko English medium mein padhaya jahan par din ki shuruat he kufriya aur shirkiya kalimat se hoti ho? Kis Sahabi ne apne bacho ko aise school mein padhaya ho jisme Isayi missionery kam karti ho? Computer aur Internet kahan se sabit hai? Internet ke through dawat kahan se sabit hai?
Agar jihalat wale sawal uthenge ki Tableegh ka nisab kahan se sabit hai to phir mujhe koi ye bataye ki Dr. Zakir naik is tarah stage lagakar, Suit aur Paint pahen kar, knot lagakar, khade hokar, speaker par aurto aur mardo ke samne khade hokar bat karna kahan se sabit hai? Sheikh Ahmad Deedat (ALLAH unki qabr ko noor se bhar de) ka is trah isaiyo se auditorium mein khitab karna kahan se sabit tha? aur istarah TV Channel release kar ke dawat dena kahan se sabit hai? is tarah TV par mardo ka akar bayan karna kahan se sabit hai? Aurto ka Q.TV par saj sawar kar nate padhna kahan se sabit hai? jab jihalat wale sawal uthenge to phir har kisi ko zere bahes laya jayega… lihaza meri ghuzarish hai, ki in fizool behnso mein na pada jaye, aur ummat ki halat dekh kar bhi in fizool aur layani baton par bahens nahi honi chahiye, ki sahab nisab aisa kyun aur waisa kyun? Kuch logo ke Fazail-e-amal par aitrazat hain meri ghuzarish hai bina tafreeqe mazhab aap Maulana Ilyas Ghumman Madzillahu Aali ki kitab “Fazail-e-amal par aitrazat ke jawabat” ko dekhe. Pakistan ke rehne wale Maulana Ilyas Ghumman sb se aitrazat ke jawabat hasil kare aur Hindustan mein rehne wale Maulana Tahir Ghayawi Damatbarkatuhumaur Maulana Syed Anzarshah Qasmi Damatbarkatuhumse apne sawalat ke jawabat talab kare. Ab agar inke jawabat se bhi wo log mutmain nahi ho sakte to phir hum kuch nahi kar sakte siwaye is ek bat ke ki bhai aap apni mehnat kare aur tableghi jamat apni, main phir se wapas ata hun apni bat par, ye 3 din, 40 din aur 4 mahine ek nisab hai, jis tarah kisi school ya madarse ko chalane ke liye usme kuch Usool banaye jate hain usi tarah Hadhrat Maulana Ilyas Rahimullah ne ye tarteeb banayi hai taki musalman apne waqt ko farigh kar ke DEEN seekhe aur ALLAH ke ahkam aur Nabi SAWW ki sunanto ki qadr karna jane aur unhe apni zindigi ka ek atoot hissa banaye, kyunki har hal mein Jannat ki kunji to Nabi Akhiruzzaman, Hadhrat Maulana Allama Sayyidul Ambiya, Imamul mursaleen wa Muslimeen, Payare Aqa Muhamamd SAWW he hai aur inki pakeeza zindigi hai.
Agar kisi ko tableeghi jamat par aetraz hai to meri usse muaddibana ghuzarish hai ki aap unhe chhode aur khud un musalmano ko dawat dene ki mehnat shuru kare, jo DEEN se bezar hai aur shaitani gumrahiyo ya badamaliyo mein pade huey hain. bat tab bigadti hai jab insan khud kuch nahi karta lekin dusro ko ghalat kahta phirta hai. Agar kisi line ko chota karna ho to uske age ek badi line bana di jaye to wo apne aap choti ho jayegi, isi tarah jise tableeghi jamat ko ghalat sabit karna ho wo khud aisi mehnat karke dikhaye aur sari duniya ke musalmano ko islam ki raghbat dilaye ya apna munh band rakhe. Ummeed hai bat ko samjhne ki koshish ki jayegi.
No comments:
Post a Comment